هي اصطلاح فرانسي قانون جو لفظ آهي، جنهن ۾ اتفاقي حادثي يا اڻڄاڻائيءَ ۾ ڪيل غلطيءَ جي حالت ۾ معاملي کي نظرانداز ڪيو ويندو آهي. ڪنهن به ٿوري طاقت رکندڙ ملڪ کان غلطيءَ وچان پاڻيءَ جي چوري، فساد يا حملو ٿي وڃڻ جهڙوڪو ڏوهه ٿي پوي، پر پوءِ به وڏي قوت رکندڙ ملڪ غلطي ڪندڙ ملڪ کي معاف ڪري ته انهيءَ کي ”Force majeure“ جي اصطلاح سان پڌرو ڪيو ويندو آهي. نظر انداز يا درگذر ڪرڻ جو اِهو عمل ٻن هڪ جيتري قوت رکندڙ ملڪن جي وچ ۾ به ٿيندو آهي ۽ ڪي واقعا اڻ ڄاڻائيءَ ۾ پڻ ٿيندا آهن. انهيءَ صورتحال جو مثال اپريل 2001ع ۾ آمريڪي سامونڊي فوج جي ويڙهاڪ هوائي جهاز جو چين جي فوجي اڏي تي اوچتو لهي پوڻ وارو واقعو آهي. ٿيو ڇا هو ته آمريڪا ۽ چين جي ويڙهاڪ هوائي جهازن جو اڻ ڄاڻائيءَ ۾ هڪٻئي سان هلڪو ٽڪر ٿي پيو، ان حادثي جي ڪري آمريڪي جنگي جهاز کي هنگامي طور هوائي اڏي تي لاهڻ ضروري هيو. Force majeure جي قانون تحت، چين جهاز کي لهڻ جي اجازت به ڏني ۽ ڪو اڻ وڻندڙ رد عمل پڻ نه ڏيکاريو. اهڙي طرح هن عمل تحت درگُذر ڪرڻ واري جذبي کي ورجايو ويندو آهي ۽ ملڪي قانونن تي سختيءَ سان عمل ڪرڻ کان پرهيز ڪئي ويندي آهي